Владата размислува да го сопре увозот на ЕУРО4 возилата, со цел помалку да има загадување, при што ќе се увезуваат возила со ЕУРО5 стандарт со што ќе се поднови и возниот парк.

За да се намали загадувањето и да се поднови возниот парк во земјава, годинава веројатно ќе се зголеми стандардот за увоз на возила, најави министерот за економија Крешник Бектеши на конференцијата „Визија за енергетска транзиција 2040“

„Согласно комуникациите што ги имаме со Министерството за животна средина, годинава, најверојатно, треба да се зголеми стандардот. Во моментов не е можен увоз на возила со еколошки стандард понизок од еуростандард 4“, рече Бектеши.
Во однос на другите мерки што се планираат во однос на еколошката компонента на транспортниот сектор, Бектеши ги спомена субвенцииите за домаќинствата за вградување плински уред, или уред на метан, како еколошки горива, мерка што ќе се спроведе годинава.

Тој рече дека се бараат средства за уште две мерки кои Министерството за економија сака да ги спроведе. Со едната би требало да им се даде директна финансиска помош на оние кои би ги замениле возила кои ги имаат, а кои се под еуростандард 4, со возила со евростандард 5 или 6. Втора мерка, за која се уште не се обезбедени средства, е субвенционирање на купување на хибридни возила.