Во вечерашното интервју во Дневникот на Сител, градоначалникот на Скопје, Петре Шилегов зборуваше за предлозите за нови имиња на улиците во градот и рече дека сега се создава регистар и од него ќе се извлечат имињата на некои улици кои треба да се променат.
– Она што го работиме ние сега е зголемување на регистарот на имиња на улици во Град Скопје. Градот Скопје досега има околу 590 имиња, ние го зголемивме за 570 плус. Значи околу 1150-1160 имиња од кои подоцна се црпат новите имиња. Е сега, градот е традиција, не можете вие на скопјани да им кажете оваа улица е „Аминта“, таа била „Ленинова“ од ’45-та наваму. Не може да се вика „Јордан Мијалков“, таа е „Железничка“ – појаснува Шилегов.
Вели дека градските власти мора да се прилагодат на навиките на граѓаните кога носат вакви одлуки.
Шилегов појаснува дека ова е процес што траел една година каде граѓаните можеле да достават свои предлози за имиња на улиците.
– Сите предлози на граѓаните беа внесени и се дел од овој регистар. Комисијата утре заседава и дефинитивно ќе го оформи (ставот) заради некои реакции што ги имаше – рече Шилегов.
Тој вели дека градот се менува, се гради и во урбанистичка и во инфраструктурна смисла, и за ова разговарал со граѓаните кога бил избран за градоначалник.
– Го тргнавме споменикот на Ќосето од пред судот, при крај е отстранувањето на трите галии во Вардар, но жал ми е што некои работи стојат, кои не зависат од нас – вели Шилегов.
Појасни, дека иако Законот бара од граѓаните да ги сменат податоците во личните документи доколку има промена на адресата, сепак, Шилегов вели дека тоа ќе биде направено, откако ќе им истечат личните документи, со следната редовна промена.
Исто така, тој зборуваше и за автобуското метро, нешто што Скопјани го очекуваат подолго време.
– Што се однесува до брзиот автобуски транспорт, ако Собранието го изгласа овој закон, ние ќи пуштиме тендерските огласи. И ако сѐ биде во ред, до крајот на 2022 година, ќе биде реализирана првата линија – рече Шилегов.
плусинфо
