Адвокатот на родилката од Дебар, Јалдз Веапоска, која по породување со царски рез дома си замина без бубрег, јајник и матка, за „А1он“ вели дека е невозможно по три извадени органи од сосема здрав човек да се тврди дека нема лекарска грешка. Тој веќе поднесе кривична пријава против шестмина лекари за извадените органи на Веапоска.
„Мојот став во поглед на ова прашање е изразен со поднесената кривична пријава против лекарите кои постапувале во овој конкретен случај, но исто така мојот став е и дека е природно и физички невозможно да отстраниш три витални органи на здрав и прав човек и притоа да тврдиш дека нема лекарска грешка. Па колку органи требаше да извадат на мојот клиент за да има лекарска грешка?! Очигледно едниот јајник што е оставен во телото на мојот клиент ги амнестира лекарите од сторена лекарска грешка. Се прашувам доколку го извадеа и овој, сега неупотреблив јајник, дали ќе имаше лекарска грешка? Ова е малку тажно за македонското здравство, зарем не?“, вели адвокатот Сашо Јанев за „А1он“.
Родилката Веапоска за „А1он“ рече дека не ја изненадила ваквата одлука на Лекарската комора оти веќе и кажале дека Мухамед Асани заминал на ручек заедно со Комисијата од лекарската комора откако направиле увид во болницата. Таа вели дека и покрај притисоците што и ги прави Асани, таа нема да се откаже од барање на правдата ниту пак од поднесената кривична пријава против лекарите кои учествувале во нејзините операции.
„Против сите лекари кои учествувале во вадењето на моите органи се поднесени пријави. Иако Асани ми пушта луѓе кои ме убедуваат да се смирам и да престанам да го гонам јас не се откажувам. Во Обвинителството бев да дадам изјава, но за кривичната што против Асани ја поднесе Државниот санитарен и здравствен инспекторат. За пријавите од мојот адвокат уште не ме повикале“, рече Веапоска за „А1он“.
Државниот санитарен и здравствен инспекторат во јануари годинава направи вонреден инспекциски надзор и утврди дека Асани дома имал дива амбуланта во која прегледувал пациентки по што му поднесе кривична пријава.
Министерот за здравство Венко Филипче денес соопшти дека Комсијата од Лекарската комора по стручниот надзор утврдила дека Асани не направил лекарска грешка во слуајот на Веапоска.
