Контролите се подеднакви на целата територија на Република Северна Македонија, не сакам да влегуваме во поделби, оти битката со вирусот не познава ниту вера, ниту нација, таа е опасност за сите нас, кажа министерот на почетокот на полицискиот час вечерва. Граѓаните имаат забрана за движење од 22 часот вечерва до 5 часот изутрина. Така ќе биде секоја вечер до 22 март.
Министерот за внатрешни работи, Оливер Спасовски, во изјава за медиумите веднаш по стапување во сила на полицискиот час, апелираше граѓаните да ја почитуваат забраната за движење иако е непопуларна рестриктивна мерка. Тој најави и санкции за оние кои нема да ја почитуваат забраната. На новинарско прашање за евидентно досегашно непочитување на полицискиот час во одредени населби и градови, министерот одговори дека мерката се однесува на сите граѓани и мора да биде спроведена во целост.
„Апелирам граѓаните да ги почитуваат мерките, на тој начин ќе придонесат во борбата против ковид-19. Секако за оние кои не почитуваат ќе има прекршочни и кривични санкции. Очекувам, како што започнавме оваа вечер, заеднички да придонесеме наредните денови да имаме стабилизација на состојбата, зачувување на здравствениот систем. Убеден сум дека ќе ја добиеме оваа битка.. Контролите се подеднакво на целата територија на Република Северна Македонија, не сакам да влегуваме во поделби оти битката со вирусот не познава ниту вера, ниту нација, таа е опасност за сите нас“,кажа Спасовски.
Министерот се заблагодари на полицијата и на медиумите за кои рече дека се на првата борбена линија, како и на граѓаните кои ги почитуваат мерките.„Знаеме дека ова е рестриктивна мерка која никој не ја посакува, меѓутоа е неопходна ако сакаме да го прекинеме ланецот на ширење на вирусот ковид-19 и мора сите да се придржуваме. Сакам да се заблагодарам на сите полициски службеници кои покрај редовните задачи имаат дополнителна задача да го контролираат спроведувањето на мерките и постојано да бидат на браникот на државата, на заштитата на здравјето на граѓаните. Од мое лично име сакам да се заблагодарам и на вас, медиумите, кои сте на првата борбена линија, оти граѓаните преку вас ги дознаваат информациите и на граѓаните кои ревносно ги почитуваат мерките за заштита“рече Спасовски.
Полицискиот час стапи на сила вечерва во 22 часот и ќе трае до 5 часот изутрина
