Во Центарот за обука на МВР во Идризово денеска 569 кандидати од генерацијата 2019-2020 година, кои минаа ригорозни конкурсни селекции и ја завршија едногодишната обука, беа промовирани во нови полициски службенци.
– Посебно се радувам што сите вие 569 кандидати, кои што ги минавте ригорозните конкурсни селекции, ја завршивте едногодишната обука со солиден успех, како една од поуспешните полициски генерации во изминативе десетина години, а како награда за вашата посветеност најдобрите од вас ќе имаат можност да бираат во која организациона единица во МВР би сакале да ја продолжат својата професионална кариера – рече министерот за внатрешни работи Оливер Спасовски.
Оваа генерација има стотина жени.
– Можеби не секогаш ќе бидете во вашата зона на комфор, бидејќи таква е природата на полициското работење и веројатно нема секогаш да можете да ги решавате сите светски проблеми одеднаш, што е одлика на младите генерации, но никогаш не ја потценувајте важноста што можете да ја имате во општеството, бидејќи историјата ни покажа дека храброста може да биде заразна, а со тоа и надежта да добие реален лик – им порача министерот Спасовски.
На најдобрите Блашко Тодоров, Никола Станоев, Павел Арсовски, Ќирче Атанасов, Роберт Коруновски, Сара Максимовска, Александар Николовски, Николче Житошански, Влатко Владевски, Кристијан Јосифовски, Јована Атанасовска, Ангела Митевска и Симеон Ристевски им беа доделени плакати.
Признанија им беа доделени и на 16 кандидати кои го завршиле основниот степен во изучување на францускиот јазсп/ик, во организација на Амбасадата на Франција во нашата земја.
