Археолозите пронајдоа остатоци од златна маска стара 3.000 години на еден археолошки локалитет во кинеската провинција Сечуан.
Маската тежи околу 280 грама, а се проценува дека е изработена од 84% злато.
„Оваа церемонијална маска е еден од повеќе од 500 објекти што археолозите ги ископале од шест новооткриени „жртвени јами“, објави Националната управа за културно наследство.
Артефактите се пронајдени во Санксингдуи, област што зафаќа 11,9 квадратни километри и се наоѓа недалеку од главниот град на провинцијата Сечуан, Ченгду.
Некои експерти веруваат дека новооткриените предмети би можеле да бидат извор на нови сознанија за античката држава Шу, кралството што владеело со западниот слив на Сечуан сè додека не се освои, во 316 година п.н.е. Покрај златната маска, археолозите откриле и златни фолии и артефакти изработени од бронза, жад и слонова коска.
