Под мотото „Да го измиеме срамот на Филипче и Заев“ денеска опозициската ВМРО-ДПМНЕ по четврти пат протестираше пред Министерството за здравство и побара оставки од министерот и премиерот. Незадоволството од начинот на кој Владата се справува со пандемијата го демонстрираа со фрлање на балони со вода кон министерството.
Според нив, општите болници низ земјава се полни со пациенти и немаат основни медицински средства, а медицинските лица купуваат сами опрема и работат до исцрпување.
СДСМ го нарекоа опозицискиот протест лицемерен, и дека на ВМРО-ДПМНЕ не му е важно здравјето на граѓаните, ниту здравствениот сектор, само политичкиот профит.
Од Министерството за здравство велат дека ВМРО-ДПМНЕ не може да се помири со фактот дека вакцинацијата се одвива без никаков проблем и дека се потсмеваат со вакцинирањето на лицата со најголем ризик од заболување.
„Вакцинацијата во време на светска пандемија е сериозен здравствен процес, колку тоа на ВМРО-ДПМНЕ да им наликува на „преправање“ (симулација). Тажно е што опозициската партија безидејно обидувајќи се да профитира политички се потсмева со вакцинирањето на лицата со најголем ризик од заболување, односно возрасните граѓани постари од 76 години“ – соопштија од Министерство за здравство.
ВМРО-ДПМНЕ велат дека министерот Филипче не е способен да набави вакцини за граѓаните, а од Министерството велат дека опозицијата од почетокот на пандемијата не придонела со ништо за заштита на здравјето на граѓаните.
Тв24
