Новинарот Марјан Николовски од Телевизија Сител, кој ја објави веста за лекувањето на двајцата владици Петар и Агатангел од ковид 19 во приватна болница, преку фејсбук реагира за начинот на кој другите медиуми и новинари ја истолкувале оваа вест.
Според него, целосно погрешен е пристапот на новинарите кои акцентот го ставиле на тоа што владиците се лекуваат во приватна болница и од каде им се парите за тоа. Вели, наместо да фаќаат врски и да го земат местото на некој друг во државните болници, тие се платиле во приватна установа.
Николовски го кажува и мотивот зошто решил да ја објави оваа вест.
„Играта се вика журнализам…
Уште на почетокот ќе бидам нескромен и ќе речам: Ако не сакав да ја објавам веста за двајцата владици на МПЦ-ОА кои се на лекување поради Ковид 19, никогаш немаше ниту да дознаете дека се заразени, а не пак и каде се лекуваат.
Но, одлуката да ја споделам веста беше професионален порив и мотивинарана од талибанските православци кои пред Велигден агресивно и нахално се нафрлаат на сите свештеници кои зборуваат за сериозноста од вирусот и потребата од вакцинација. Целта беше кога ќе прочитаат дека двајца владици на МПЦ-ОА се на болничко лекување, можеби ќе стават прст на глава и ќе разберат дека Бог е милостив и помага така што создал лекари и медицина.
