Германскиот државен министер Михаел Рот денеска пред почетокот на ГАК во Брисел уште еднаш порача дека ЕУ мора да почне преговори со Македонија и Албанија што е можно побрзо. Но ова се чини не допира до Бугарија. Досегашната министерка за надворешни работи Екатерина Захариева вели дека нема напредок, па не гледаат причина за одржување меѓувладина конференција следните два месеца објавува мкд.мк.
„Европската Унија мора да ги одржува своите ветувања. И двете земји, Албанија и Северна Македонија испорачаа и затоа сега треба да испорача ЕУ. Мора да ги почнеме преговорите за членство со Албанија и Северна Македонија што е можно поскоро“, порача Рот.
Тој во видео обраќањето вели дека билатералните прашања треба да се решаваат на билатерално, а не на ниво на ЕУ.
„Тоа е одговорност на 27-те земји членки“, додава Рот.
Иако вчера речиси сите министри на ЕУ во Брисел излегоа со иста порака за почеток на преговорите, Захариева „пресече“ како и досега – „не можеме да ја одобриме преговарачката рамка за Скопје“.
„За да ја одобриме преговарачката рамка, Република Северна Македонија треба да покаже дека ги почитува човековите права. Не може да прифатиме луѓето со бугарска самоопределба да бидат ноќе испрашувани од тајните служби или да не можат со години да најдат работа, бидејќи се горди на своето бугарско потекло“, објави Захариева на својот официјален профил на Фејсбук.Таа додава дека не гледа напредок и дека Договорот за добрососедство не се почитува.
„За жал, до моментов не гледаме напредок. Договорот за добрососедство не се почитува, па според тоа нема како да се одржи меѓувладина конференција следниот месец или после него (јуни или јули).
Европската комисија и денеска потврди дека Софија и Скопје треба да најдат решение. Нашите соседи продолжуваат да бараат оправдувања за своето недејствување“, пишува Захариева.
По вчерашните средби во Брисел се огласи и македонскиот министер за надворешни работи, Бујар Османи со објава дека „Република Северна Македонија претставува пример во регионот за тоа како се имплементираат европски реформи, но и како се промовираат европските вредности, што беше нотирано и во Резолуцијата за земјава од страна на Европскиот парламент“. „Почеток на преговорите со ЕУ ќе значи евалуација на тоа признание како силен поттик за европските перспективи на целиот регион“, напиша Османи по средбата на македонската владина делегација со бугарскиот европратеник и известител за Македонија во Европскиот парламент, Илхан Кјучук.
„The European Union has to keep its promises. Both #Albania & North #Macedonia have already delivered. That’s why the EU has to deliver right now. We have to start #EUaccession talks with Albania & North Macedonia asap.“ – State Minister @MiRo_SPD ahead of today’s #GAC. 🇪🇺🇲🇰🇦🇱 pic.twitter.com/e9wSoNyLUU
— Germany in the EU (@germanyintheeu) May 11, 2021
Кјучук, пак, без коментари за почеток на преговорите објави дека на средбата со Заев и Османи било истакнато дека поврзаноста меѓу Македонија и Бугарија е клучот за добрососедските односи.
„Потребна ни е: Агенда заснована врз иднината; Поврзување – инфраструктура, дигитална, образовна и културна; Враќање на довербата и зајакнување на односите меѓу Бугарија и Република Северна Македонија“, напиша Кјучук.
