Премиерот Зоран Заев во интервју за МИА открива дека неговиот грчки колега, Кирјакос Мицотакис на вчерашната средба во Атина му презентирал повеќе различни идеи, кои Заев ги цени како креативни и позитивни, како да се отстрани ветото на Софија и Македонија да го продолжи патот кон членство во Европската Унија.
„Јас верувам дека прво ќе се најде некое решение со Бугарија, затоа што проблемот не е од таква природа каде што би можел да биде пречка, имајќи предвид дека допрва се отвораат 35 поглавја и на отворање и на затварање се носат одлуки од сите земји- членки, така да верувам дека намалените тензии и кај нас и во Бугарија ќе помогнат во целиот тој дел. Но, ни треба помош и од сите други пријатели, а премиерот Мицотакис разви неколку идеи и многу сум благодарен заради креативноста која што ја понуди. Нормално не можам да ги коментирам, затоа што сепак тие тоа треба да го направат, но за нас се исклучиво позитивни“, вели премиерот Заев во интервју за МИА.
И во интервјуто премиерот изрази оптимизам дека ќе се најде решение со Бугарија бидејќи како што вели тоа е проблем и предизвик не само за Македонија, туки и Унијата и нејзините земји членки, вклучувајќи ја и Грција и Бугарија.
„Така да треба да ја мислат и тие заедно, а Грција исто така затоа што го тангира и Преспанскиот договор и треба да биде дополнително заинтересирана и на крајот е голем поддржувач на интеграциите на Македонија и на Албанија затоа што сѐ почна од 2003 година од Солунскиот самит, кога се сврте фокусот на евроинтеграциите на Западен Блкан во Европската Унија“, вели Заев.
Заев се сретна и со поранешниот грчки премиер Алексис Ципрас. Се согласиле дека договорот за името е силно признаем и изразиле задоволство што на него се гледа како пример за решавање и други меѓудржавни спорови. Придобивките од Преспанскиот договор потврдени и на средбата на Заев со американскиот амбасадор во Грција, Џефри Пајат, кој договорот, како што се наведува во владиното соопштение, го оценил како најпозитивно изненадување во неговиот досегашен петгодишен мандат како амбасадор на САД во Грција.
