Министерот за транспорт и врски, Благој Бочварски и директорот на Јавното претпријатие за државни патишта, Ејуп Рустеми, извршија увид во градежните активности на автопатот Кичево-Охрид. Бочварски рече дека автопатот ќе биде заврши кон крајот на 2023 или почетокот на 2024 година, истакнувајќи дека изградбата на овој автопат е најголемиот проект во историјата на Македонија.
Рустеми, пак, подвлече дека реализацијата на изградбата во првото тримесечје од 2021 е 5,14 милиони евра, а вкупната реализација до сега изнесува 322,4 милиони евра.
„Досегашната реализација е 322,4 милиони евра а реализацијата за првото тримесечје е 5,14 милиони евра. Сакам да истакнам дека сега почнуваме со голем интензитет и оваа година се надевам дека по одобрувањето на неколку проекти од инфраструктурата од страна на Министерството за транспорт и врски ќе има повеќе работа и активности што е многу важно за Коридорот 8“, вели Ејуп Рустеми.
Автопатот Кичево- Охрид започна да се гради во 2014, а досега се реализирани само 62% од работите. За ова денеска реагираше коалицијата АА-ААА прашувајќи го јавно премиерот Зоран Заев каде е правдата за, цитираме „криминалот и корупцијата“ во овој проект, што го пријавуваше преку прислушуваните разговори. Дали ќе заврши и овој случај со амнестија и партнерство со криминалот како што завршија сите досегашни случаи?
