Седум починати во изминатите 24 часа бележи Ковид центарот во Клиничката болница во Тетово, а меѓу нив најмлада е 19-годишна девојка. Оваа информација утрово ја потресе јавноста за млад изгубен живот. Сакајќи да се информираме зошто згаснал толку млад живот, дали девојката имала коморбидитети, дали била вакцинирана или не, ММС се јави во Ковид центарот во Тетово, од каде ни рекоа дека меѓу починатите, сепак, немаат 19 годишна девојка.
-Поради погрешно пренесен матичниот број на еден од пациентите кои починаа како последица од Ковид 19 во јавноста излезе информација дека од вирусот животот го загуби 19 годишна девојка од Тетово, ни рекоа од Клиничката болница, кои ја демантираа оваа информација попладнево.
-Се работи за пропуст при пренесување на информациите. Не се се работи за 19 годишно девојче, тука за жена од 61 година, која имала коморбидитети како и останатите пациенти. Се работи за ненамерна грешка при пренесување на матичниот број на пациентот кој што почина. Пак ќе повторам, нема 19 туку 61 година. Денес имаме седум починати пациенти, родени 1956 година, 1976 година,1948 година, 1960 година, 1964 година, 1945 година и една жена шта починала била на возраст од 61 година, која е помешана како да е 19 години. Таа како и сите останати пациенти има коморбидитети, особено со срцеви болести, прекумерна телесна тежина и дијабетес. Имала операција на срце и претходно некои други интервенции, рече д-р Гзим Нуредини раководител на Ковид центарот при Клиничката болница Тетово за ММС.
Доктор Нуредини вели дека ниту еден од починатите нема примено вакцина, а ретко кој од хоспитализираните се имунизирани, податок кој доволно говори дека вакцинацијата е спас од оваа заразна и опасна болест.
Извор: ММС
