Претседателот на Собранието Талат Џафери, нема денеска да има воведно обраќање на презентацијата на Акцискиот план 2021 – 2023 на Собранието, на кој ќе има и јавни консултации со Граѓанското општество.
Наместо него, воведно обраќање, меѓу другите, има потпретседателот на Собранието, Горан Мисовски.
Причина зошто спикерот Талат Џафери нема да се обрати, како што велат од Собранието, е ненадејната промена на агендата до која дошло утрово, поради, како што објаснуваат оттаму, смртен случај кој го имал Џафери во неговото потесно семејство.
„Претседателот поради непредвидлива ситуација, не е во можност да присуствува лично, бидејќи има смртен случај. Му почина зетот од сестра, 64 годишен“, објаснуваат со жалење од Собранието.
Покрај Мисовски, воведни обраќања ќе имаат Роберт Скот Хејзлет, тим-лидер на Програмата за парламентарна поддршка и виш резидентен директор на Националниот демократски институт (НДИ), како и Сандра Пернар, Партнерство за отворени власти (ПОВ), виш регионален координатор.
На презентацијата ќе се дадат клучните наоди од Мониторинг-извештајот за ПОВ Акцискиот план 2018 – 2020, со обраќање на Александра Јовевска-Ѓорѓевиќ, истражувачка од Институтот за демократија Социетас Цивилис – Скопје (ИДСЦС).
Потоа, ќе има презентација: Заложбите во ПОВ Акцискиот план 2021-2023, Златко Атанасов, координатор за ПОВ и раководител на Парламентарниот институт, Собрание, потоа Презентација: клучни наоди од истражувањето на јавно мислење (февруари / март 2021 год.), Вљора Речица, раководителка на Центарот за парламентарна поддршка и демократизација, Институт за демократија Социетас Цивилис – Скопје (ИДСЦС).
Ќе има и паралелни тематски сесии.
