Четворица пациенти се хоспитализирани во Скопје, еден е во потешка клиничка слика и е на респиратор. За сите се чекаат резултатите за да се види дали имаат индиски сој од коронавирусот, рече денеска министерот за здравство Венко Филипче. Тој потврди дека кај еден пациент од Велес вчера било потврдено присуството на оваа делта варијанта. Министерот денеска ја посети Клиниката за неврохирургија каде ќе се изврши иновативна хируршка метода „вградување стимулатор на нервот вагус”.
„Сите четворица се лекуваат овде во Скопје, а еден од нив е со потешка клиничка слика и е на респиратор, другите се со стабилна состојба. Скринингот кој се прави на тестовите се прави на сите тестови и ја исклучува британската варијанта, доколку покаже дека не е таа, се прави секвенционирање за да се покаже присуството на Делта варијантата, а тоа сега се прави кај овие четири пациенти и до вечер ќе ги имаме резултатите“ рече Филипче.
Ако кај нив биде потврдена во Макеоднија ќе има осум случаи на овој вид на вирусот кои не се поврзани меѓу себе.
Овие пациенти не биле вакцинирани, а засега не е познато дали патувале во странство
