Централната прослава на Охридскиот договор ќе се одвива според планираното. Владата нема да отстапи од масовната манифестација планирана два дена пред стапувањето на сила на новите антиковид мерки. Околу 200 гости во затворен простор ќе го одбележат јубилејот, а организаторот – Министерството за политички систем, уверува дека ќе бидат запазени сите безбедносни протоколи.
За првиот човек на Министерството, реакциите се неразбирливи.
“Централниот настан во Александар Палас на 13 август ќе биде во сала која собира 1500 луѓе а ќе присуствуваат не повеќе од 200 луѓе кои што ќе носат маски, ќе бидат повеќе од 1.5 метар разделечени, ќе им се мери температура пред влезот. Затоа не ја разбирам оваа масовна хистерија по социјалните мрежи, се надевам дека не се донесува на Охридскиот рамковен договор”
Вртоглавиот раст на новозаразени сепак го натера организаторот на отстапки во дел од програмата.
“Предвиден беше огромен концерт на плоштадот Македонија на 13.08, но како Министерство решивме да го откажеме”
Ја почитуваме науката и здравствените власти – сличен став како и на првиот вицепремиер доаѓа и од министерот Османи.
“Ако здравствените власти сметаат дека до одреден период може да се правата собири, ние ќе ги почитуваме тековните протоколи, а ќе ги почитуваме и одлуките на здравствената комисија”
Иако владата ги усвои новите мерки за заштита од Ковид уште на 7-ми, тие официјално ќе стапат на сила на 16-ти август. Во јавноста се шпекулира дека тој датум е избран само за да се биде одржана прославата.
Од Министерството за здравство побаравме, но не добивме одговор зошто се потребни 10 дена за да почне да се применува владината одлука.
