„Рамковниот договор го издржа тестот на времето но е далеку од совршен“ – заклучи претседателот Стево Пендаровски кој со долгометражен говор се истакна пред јавноста за време на одбележувањето на 20-годишнината од потпишувањето на Охридскиот Договор. Ова предизвика низа реакции, дел од нив негативни, токму поради фактот што претседателот на најголемиот празник на државата – Илинден, се обрати со видео порака наместо да даде изјава во живо пред граѓаните, како што беше пракса претходните години. Но затоа најде време да одржи долг говор по повод годишнината која помпезно ја прослави цел државен врв.
„Рамковниот договор го издржа тестот на времето, иако е далеку од совршен. Ако во него бараме пропусти, тогаш, според мене, најголемата грешка беше тоа што под притисок на крајно неповолната динамика од настаните на теренот, учесниците во преговорите воопшто немаа време да се посветат на правата и статусот на помалку бројните етнички заедници и поради тоа договорот со право е квалификуван како бинационален, а, тоа сигурно не е предност во едно мултикултурно општество“ рече претседателот Стево Пендаровски и додаде дека во хетерогена политичка заедница како нашата, бинационалниот не смее да биде замена за автентичниот мултинационален модел кој треба да го развиваме.
