Оваа операција на Владата, или на НАТО алијансата, е хумано прифаќање на дел од граѓаните коишто практично треба да бидат одреден временски период овде, на територијата на нашата држава, и да заминат понатаму во САД или во трети земји, изјави министерот за внатрешни работи, Оливер Спасовски во своето вечерашно гостување во емисијата „10 минути“ на ТВ 21.
– Станува збор за државјани на Авганистан, коишто работеле во мисијата на Обединетите нации, во мисијата на САД, Националниот демократски институт или во Невладини организации коишто се занимаваат со човекови права и членови на нивни семејства. Овде не станува збор за мигранти коишто го напуштаат Авганистан и доаѓаат тука, посочи Спасовски.
Како што вели тој, Владата презела обврска да смести околу 450 лица.
– Тие нема да бидат сместувани во никакви кампови, во никакви Прифатни центри, ниту во Табановце, ниту во Гевгелија, ниту ќе бидат во Центар за странци. Едноставно, тие ќе бидат сместени во хотели и во мотели и нивниот престој ќе го плати организацијата којашто ги носи, односно за којашто работеле. Државата ќе обезбеди целосна општествена поддршка, а тоа значи лекарски прегледи и сѐ друго што е потребно, објаснува Спасовски.
