Збунетост кај родителите пред стартот на учебната година. Едни сакаат настава со физичко присуство, други се плашат од коронавирусот и бараат децата да им учат онлајн.
„Децата требат со физичко присуство, но поради тоа што доаѓа цунами, имаме секој ден по 30 починати, млади луѓе кои имаат тешки клинички слики, сметаме дека оваа година онлајн наставата треба да се одржи по секоја цена“ – вели Ана Глигорова од Здружение за поддршка на онлајн настава.
Од друга страна, од здружението „Настава и учебници мора да има“, кое брои над 80 000 членови од самиот старт се за настава со физичко приуство. Но тие се против новата концепција и дигитализација на учебниците. Иако министерката веќе ги промовираше дигиталните учебници за четврто одделение, од Здружението велат дека тоа што Министерството го направи без да ја послуша јавноста е повреда на родителските и детските права. Најавија последен обид да ја спречат новата концепција а ќе поднесат претставки и до Уставниот суд.
„Се припремаат претставки до Уставен суд за утврдување на судир на интереси и злоупотреба на положбата, се бара одговорност од министерката Царовска, министерството и колективна одговорност од Владата“ – вели Драгана Спасевска од „Настава и учебници мора да има“.
