Вечерва во Скопје се очекува да пристигнат 149 граѓани од Авганистан
Група на граѓани од Авганистан веќе пристигнаа во Косово, 29 август, 2021.
Група на граѓани од Авганистан веќе пристигнаа во Косово, 29 август, 2021.
Првата група на граѓани од Авганистан вечерва пристигнува на аеродромот Скопје. Според информациите од Владата вечерва се очекува да пристигнат 149 граѓани на Авганистан, вработени, соработници и членови на нивни семејства, на меѓународната организација Отворено владино партнерство (Open Government Partnership – OGP) каде што Северна Македонија е официјално членка, како и вработени и соработници на Transparency International, Wold Economic Forum и други меѓународни организации.
„Станува збор за граѓани кои беа животно загрозени од талибанските структури и на кои им помагаме да си го спасат животот. Тоа се граѓани кои 20 години работеа за демократските институции, мисии и меѓународни организации во Авганистан“, велат од Владата.
На скопскиот аеродром ќе бидат прифатени од МНР, МВР, Црвениот Крст, Министерството за здравство и меѓународните организации, а ќе бидат сместени во хотели и мотели, како што беше претходно најавено. Црвениот крст ќе биде првиот контакт за граѓаните од Авганистан, МВР ќе ги спроведе сите безбедносни проверки, а Министерството за здравство ќе обезбеди ПЦР тест и можност за вакцина.
Извор: Слободна Европа
