Предупредувачки бојкот на наставата во четврто одделение се одржа денеска во основното училиште „7 Март“ во Милетино, Општина Брвеница. Родителите се незадоволни што учениците не добиле печатени учебници и ќе треба да учат од дигитални учебници како што е предвидено со новиот концепт на настава за четврто одделение.
– Никој не е против дигитализацијата во наставата, но бараме тоа да биде помошно средство. За објаснување. Книгата да биде главно средство за наставата. Учебник е учебник. Образованието е бесплатно за сите, а ваму сме приморани да печатиме учебници. Немаат сите можности ниту да печатат учебници ниту да купуваат таблети или други уреди за следење на наставата изјави Ненад Ѓорѓески, родител и член на училишниот одбор во ОУ „7 Март“ во Милетино.
Министерката за образование Царовска вели, бојкотот нема да користи никому.
– Наставниците се задоволни од новата програма за прво и четврто одделение и се подготвени да ја спроведат. Затоа апелирам до родителите, но и до одредени политички партии да ги тргнат настрана своите тесни лични интереси и во моментов да го следат интересот на децата – изјави министерката за образование и наука Мила Царовска при денешната посета на Државното училиште за рехабилитација на деца и младинци со оштетен вид „Димитар Влахов” во општина Кисела Вода, коментирајќи ги заканите за бојкот на наставата поради новата програма.
– Ниту едно училиште не е затворено заради бојкот. Бојкотот не врши работа на никого, а најмалку е во интерес на учениците. Јас како министерка, и ние како Влада, интензивно се трудиме да обезбедиме образование коешто работи и е во функција на секое дете, рече Царовска.
Таа посочи дека новата програма треба да даде квалитет и да ги насочи учениците да учат и да ги поврзуваат сите теми кои се дадени во наставните програми и понатаму во животот да можат да ги применат тие знаења.
Граѓанската иницијатива „Учебници и настава мора да има“ е иницијатор на денешниот предупредувачки бојкот на наставата.
