Од Државниот завод за статистика нема конкретен одговор дали ќе побара дополнителен рок за завршување на пописот и по 30-ти септември, дознава Алсат.
Ова не били разговарано ниту на синоќешната владина седница, иако министерот за правда, Бојан Маричиќ вели дека верува оти се ќе заврши со време, но дека ќе чекаат на ставот на Заводот.
Од Алијанса за Албанците велат дека изјавата на министерот за правда отвара сомнеж дека Владата се меша во работата на Заводот за статистика. Тие, исто така, итно бараат продолжување на пописот.
„Го покануваме министерот да не дава такви изјави, бидејќи со изјави тој нема да го реши проблемот, туку само ќе ги покрие неговите лични каприци и оние на неговата влада. Од друга страна, повторно апелираме до Парламентот итно да се свика и да донесе одлука за продолжување на пописот“, рекоа од Алијанса за Албанците.
Во вчерашното соопштение тие велат дека намерно бил прекинат пописот во април за да се оневозможи албанската дијаспора да се попишува.
„Пописот се одложи, просто, за да спласне еуфоријата и мотивацијата на Албанците да се попишат. Дали некој е запознаен дека диајаспората од моментот на одложувањето комплетно го има игнорирано овој процес и не продолжи да се попишува. Значи, се докажува тоа што ние го велевме, дека ова е една политичка одлука преземена како одговор на масовното излегување на Албанците да се попишат“, велат од АА.
Портпаролот на ВМРО-ДПМНЕ Димче Арсовски наведува дека нема да учествуваат на евентуалната седница за продолжување на пописот.
