СДСМ не успеа да го зачува водството од првиот круг на нивниот кандидат за градоначалник на Шуто Оризари, Ферит Асан. Неговиот опонент Курто Дудуш успеа да ја надомести разликата и да остане на чело на оваа скопска општина.
Дудуш на минатите локални избори во 2017 година учествуваше како кадровско решение на СДСМ. Во слично сценарио како „кумановското“ со Максим Димитриевски и него оваа есен социјалдемократите решија да не го номинираат, па тој на изборите ја прифати понудата на коалицијата ЛДП-ДОМ да настапи како нивен кандидат.
Во првиот круг Дудуш заостануваше за нешто помалку од 1 000 гласа од фаворитот на СДСМ. Пресвртот во вториот круг му го обезбедија дополнителните безмалку 2 000 гласа, добиени од учесниците кои излегоа од првиот дел од трката. На контото на неговиот противкандидат во вториот круг се слеа само околу 200 гласа повеќе од првото соочување, со што Дудуш стаса до предност која му овозможи да остане уште четири години на чело на скопската општина Шуто Оризари.
