Пронајден е златниот часовник марка Patek Philippe, кој му припаѓаше на поранешниот претседател на Југославија, Јосип Броз Тито, а беше украден пред повеќе од една деценија.
Ова го соопшти српската министерка за култура Маја Гојковиќ. Таа рече дека познатиот луксузен часовник Patek Philippe исчезнал од Музејот на Југославија, додека била актуелна изложбата на часовници кои претседателот Тито ги добил на подарок или ги купил за својата колекција.
По повеќе од една деценија, часовникот се појавил на редовна аукција во Хонгконг, која веднаш била прекината, благодарение на директорката на Музејот на Југославија – Неда Кнежевиќ, која алармирала за целиот случај.
Во изјава за ТВ Прва, министерката за култура истакна дека кражбата на артефакти е многу профитабилен бизнис на црниот пазар денес, а вредноста на украдените ремек-дела од Србија е околу половина милион евра, пренесе РТС.
