По грозоморниот чин кај Фиер, каде маж со лопата уби дете, албанската јавност бара враќање на смртната казна. Албанскиот премиер Еди Рама вели дека тоа не е можно.
Рама изјави дека враќањето на ваква пресуда не е ниту можно, ниту е волшебно стапче за да се спречат вакви настани кои се случуваат во сите општества.
Додаде дека ја разбира оваа реакција, но прашањето за смртната казна е прашање кое одамна е оценето како цивилизациско прашање.
Тој не ја исклучи можноста за преиспитување на законската регулатива за зголемување на висината на казната.
Инаку, маж со лопата го убил детето на соседите и го закопал во дворот. Телото на осумгодишниот Матео Васиу, е предадено на семејството, по обдукцијата, во која е потврдено дека Клодиан Чаламани (38), го усмртил со повеќе удари со лопата во пределот на главата. На местото во училишната клупа неговите другарчиња денеска поставија букет цвеќе.
Последната смртна пресуда во Албанија е извршена на 25 јуни 1992 година, кога во центарот на градот Фиер беа обесени браќата Јосиф и Дритбард Чуко од селото Либофш, кои беа осудени за повеќекратно убиство, случај познат како „Масакрот во Либофш“. Тие на 29 мај 1992 година при обид за кражба во куќата на семејството Путо во споменатото село убија пет лица, мајка,татко, син, снаа и нивната осуммесечна ќерка.
