Во Охрид ќе има, а во Струга нема да има организиран дочек на Нова година на отворено. Струшките градски власти ваквата одлука ја правдаат со штедењето пари поради енергетската криза. Заштедените пари, велат, ќе биле пренаменети за потребите на јавните претпријатија.
„Декорацијата на градот ќе се изврши во централното градско подрачје, скромно и ќе биде изведено од јавното комунално претпријатие – Струга. Ваквата одлука е донесена со оглед на кризната состојба во енергетскиот сектор“, велат од Општина Струга.
Но, дел од туристичките работници сметаат дека Струга е туристички центар и оти треба да се организира некаков новогодишен настан на отворено.
„Сигурно дека локалната власт мора да организира нешто добро за да привлече повеќе туристи…“, рече Ерхан Папранику-менаџер на хотел.
Во Струга единствено ќе има забава за деца и прошетка на Дедо Мраз низ градот. Во Охрид пак, на градскиот плоштад на 31 декември ќе настапат локални бендови и изведувачи, а забава ќе има и на 1 јануари.
„Ние не смееме да си дозволиме да имаме неукрасен град. Ќе биде украсен Охрид, ќе изгледа добро, ќе има скромен настан на градскиот плоштад каде ќе има само изведувачи од нашиот град“, вели Кирил Пецаков-градоначалник на Охрид.
Инаку во поголем дел од хотелите покрај Охридското езеро годинава нема да има дочек на Новата година поради постоечките протоколи, со кои се дозволува капацитетот на објектите да биде со исполнетост од максимум 50%.
Мики Трајковски Алсат
