Повеќе од 27 години Наталија живеела под семејно насилство. Сопругот- насилник работел во судот во Кочани. Преклани во септември се одиграл крвавиот епилог на оваа од државата дозволена семејна драма. Сторијата за семејството Стоиловски од Кочани ќе ја гледате вечерва во КОД. Сопругот-насилник Ванчо Стоилковски загинува од 4 длабоки убоди со нож.
И додека државата го гони за убиство постариот син, семејството тврди дека станува збор за самоубиство и дека нема убијци во нивниот дом. Случајот е вратен на повторно судење.
Во куќата на семејството Стоиловски во Кочани мајката и сопруга Наталија преживеала втор напад со секира за една седмица. Но сопругот Ванчо не преживеал. Со 4 убоди од нож, длабоки меѓу 10 и 14 сантиметри лежел мртов на плочникот во дворот.
По првичната истрага, полицијата покренува истрага за убиство, а обвинет и суден за смртта на таткото е постариот син. Вештачењата тврдат станува збор за убиство. Но и обвинетиот и мајката и неговиот помал брат тврдат дека станува збор за самоубиство.
По првичното судење и двегодишна затворска казна, штипска апелација го врати случајот на почеток. Вториот судски процес ќе се одвива во кочанскиот суд, каде настраданиот работел како судски курир и им било познато дека е семеен насилник .
Злосторот и жртвата можеле и да се избегнат доколку социјалните служби и полицијата се потрудиле и презеле повеќе за заштита на жената која речиси три децении трпела болка и малтретирање. Но, никој од надлежните служби не е на обвинителна клупа.
Во КОД вечерва две стории во кои две жени тврдат дека се жртви на сериозни лекарски грешки, едниот случај се одиграл во Систина, а судот ја отфрлил тужбата на пациентката.
Вториот случај е во тетовската клиничка болница каде родилка едвај го преживеала царскиот рез и била лекувана со чај и шишиња топла вода.
КОД е вечерва на Телма во 19:15.
