Владимир Милчин, долгогодишниот директор на Фондацијата Отворено Општество Македонија и со тоа еден од организаторите на Шарената Револуција, вечерва повика на здружување на власта и опозицијата за да се отфрлат притисоците на Бугарија, и оцени дека Македонија треба да остане надвор од Европската Унија, доколку цената што треба да се плати е губење на идентитетот. Во интервјуто за Канал 5, новинарот Гоце Михајлоски повеќе пати ги објаснуваше бугарските ставови и прашуваше дали е тоа истиот оној Милчин кој застапуваше дијаметрално спротивни ставови во времето на Груевски, на што доби одговори дека ЕУ можеби и ќе се распадне, а Македонија треба да се обиде да преговара но без да прави отстапки.
Вие викавте дека Македонија не смее да биде изолирана од ЕУ. Мислите дека ЕУ ни треба помалку денес? Мислите дека ние можеме да опстанеме надвор од Европската Унија, прашуваше Михајлоски.
Европската Унија не е иста денес како пред 15 години. Тоа треба да го имаат предвид. Мислам дека ЕУ е помалку привлечна денес.. Дали сите членки на ЕУ напредуваат? Бугарија губи голем дел од населението, ако е толку добро таму зошто не остануваат? Одат надвор. Одат и нашите, ама ние не сме членка на Европската Унија… Нема да ги задржиме луѓето како што ја тераат работата Заев и Ковачевски. Да видиме што правиме со нашата сегашност, утре, задутре. Јас сакам да станеме членка на ЕУ, но тоа не значи дека ја идеализирам ЕУ и дека ако не сме во ЕУ тоа ќе биде еднакво на крај. Вака како што оди, тоа бавно ќе оди. Може да се случи ЕУ и да ја нема. Зошто го исклучуваме тоа како можност? Што е гаранцијата за долговечноста на ЕУ?, изјави Милчин.
Според Милчин, преговорите за влез во ЕУ може да траат предолго, имајќи предвид дека Бугарија отвара минорни спорови, како што беше неодамнешниот инцидент во Битола каде излог во дуќанот на секретарот на клубот Иван Михајлов бил скршен наводно од неговата сопруга. „А да ни даде Бугарија објаснување зошто не ги почитуваат пресудите на судот во Стразбур? Некој од ЕУ треба да ги праша за тоа“, изјави Милчин, обвинувајќи ја Бугарија за минимизирање на нејзината улога во Холокаустот. „Во однесувањето на бугарската страна гледам дека они сметаат дека оваа екипа е мека, и дека тие ќе успеат“, рече Милчин, оценувајќи ја попустливоста на Заев и Ковачевски како причина за засилените бугарски притисоци.
Режисерот воедно го обвини Зоран Заев дека ја излажал јавноста и ги изневерил очекувањата на „шарените“, во поглед на правдата и економијата.
Мислам дека просто не излажа. Речиси за се. Мене лично на пример. Не приватни работи мои. Економијата, правдата.., изјави Милчин.
