Технички неисправни автобуси и комбиња, транспорт без соодветни дозволи, бројни сообраќајни прекршоци и непочитувањ
Со технички неисправни автобуси и комбиња во Македонија се превезуваат деца. По случајна селекција на околу 250 возила за само три часа, полицијата исклучила од сообраќај единаесет автобуси кои вршеле јавен превоз на ученици, а откако е утврдено дека се технички неисправни. Дополнително, од МВР велат дека осум автобуси се затекнати без соодветни документи за вршење на јавен превоз, а дел од превозниците не ги почитувале ковид мерките, па се загрозувало и здравјето на учениците.
„Биле исконтролирани 249 возила кои вршат јавен превоз на деца кон училиштата на 102 локации, при што биле констатирани 8 кривични дела по член 284-а за вршење на јавен превоз без соодветна документација, и 48 прекршоци, од кои 29 од Законот за безбедност на сообраќајот на патиштата, 16 од Законот за возила, 3 од Законот за заштита на населението од заразни болести и сл. Во станица за технички преглед биле упатени 41 возило, а од сообраќај биле исклучени 11 возила кои вршат јавен превоз поради техничка неисправност и други констатирани недоследности.“
Освен автобусите, полицајците ги контролирале и учениците кои се превезувале. Полнолетните средношколци ги легитимирале, а проверувале и дали некој носи оружје.
„За време на контролата на подрачјата на сите сектори за внатрешни работи биле легитимирани 277 полнолетни средношколци, а извршени се 2.211 прегледи кај ученици, во однос на почитување на Законот за оружјето, Законот за правда на детето и Кривичниот законик.“
Во јавноста се покрена прашањето за безбедноста во превозот, особено по траорната несреќа што се случи во Бугарија во која животот го загубија 46 лица, помеѓу кои 12 деца. Раната истрага утврди дека автобусот кој не смеел да биде учесник во слободен сообраќај минал три граници без соодветна документација.
