Лицата кои сакаат да се вработат во Министерството за внатрешни работи ќе мора да направат тест за интегритет. Освен на новите вработени, и на веќе „постарите“ полицајци ќе им биде направен ваков тест, а истиот нема да трае засекогаш, односно ќе мора постојано да се реоценува. За полициските службеници ќе се воведе и обврска за пријавување на нивниот имот и интереси.
Со предложената измена на законот се забранува работник на Министерството да членува во политичка партија, што досега не беше случај. Овие нови правила ги предвидуваат измените на Законот за внатрешни работи, кој е пред пратениците од собраниската Законодавно-правна комисија.
Интегритет и деполитизација на вработените во МВР, оперативна независност на полицијата, воведување обврска за пријавување имот и интереси, се дел од прашањата што се уредени со предлог-измените на Законот за внатрешни работи, кој е пуштен во собраниска процедура, а за кој од МВР велат дека ќе обезбеди висок степен на професионалност и објективност во работењето.
„За постојните работници, пак, заради спречување на корупција и злоупотреба на службената положба, а со цел јакнење на интегритетот на секој работник, се предлага да се врши проверка на интегритетот, преку спроведување тест за професионален интегритет“, појаснуваат од МВР.Со предложените измени на Законот за полиција се предлага воспоставување на строги, објективни и професионални критериуми за именување на директор на полицијата кои одговараат на потребите на таквата позиција. Меѓу наведените услови за првпат како услов е предвидено да не е член на политичка партија или член на органи и тела на политичка партија. Некои од новите законски решенија се реализација на обврските за МВР содржани во Акциониот план по Националната стратегија за спречување на корупцијата и судирот на интереси (2020-2024) на Државната комисија за спречување на корупцијата“, додаваат од МВР.
