Македонскиот бизнисмен Орце Камчев, обвинет во случајот „Плацови на Водно“, по вторпат во еден месец е позитивен на Ковид-19. Ова беше и причината да се одложи денешното рочиште на кое беше предвидено да се сослушаат повеќе сведоци.
Последното рочиште кога обвинетиот Камчев тврдеше дека има позитивен тест беше на 28 јануари 2022 година. Според одбраната на Камчев, тој ден пред тогашното рочиште направил брз антигенски тест за ковид-19 во „Систина“ и бил детектиран вирусот, но сè уште чекаше решение за самоизолација, па се појави во судница и седна сам на спротивната страна од другите присутни. Како што рекоа неговите адвокати, тој појавил симптоми по контакт со заболено лице.
