Осум години гинат цивили во Донбас, а Македонија не реагираше, вели пратеникот од Левица, Борис Крмов.
Објасни дека неговата партија не ја поддржа Декларацијата за осудата на рускиот напад во Украина.
„Најголем дел од луѓето мислат дека војната е од вчера, односно тие осум дена откако почна војната. Не е од сега, туку е од 2014 година, а имаме ситуација да осум години луѓето во Донбас се нон-стоп гранатирани и бомбардирани. Имаме 14 илјади цивилни жртви, од кои според Обединетите нации 81% се од страната на Донбас“, изјави Крмов.
Тој вели дека Декларација е еднострана.
„Го немаме моментот од 2014 година, од насилното рушење на власта во Украина, немаме осум години убивање на цивили, го нема нивното константно кршење на права во источна Украина. Пример е дека еден ден беше забранет рускиот јазик, беа подложни на асимилација и на крај, улогата на НАТО како главен провокатор и воен хушкач во оваа ситуација. Токму заради таа едностраност, ние како партија Левица нема да ја поддржиме оваа декларација“, појасни Крмов.
Веќе десет дена Русите и Украинците војуваат во Украина.
