На денешните завршни зборови за случајот “Меѓународен сојуз”, обвинителот Трајче Пеливанов истакна дека обвинетите Бојан Јовановски и неговиот татко, Миле Јовановски, немале легални приходи.
Адвокатот Сашко Дукоски пак истакна дека тоа не е точно, и дека во текот на судењето докажале потекло на имот.
-Докажавме потекло на имот. Јовановски можеби во тој момент не работел, но претходно работел 30 години. Тој продал и два стана и дуќан, а каде е пропишано дека парите морал веднаш да ги потроши?, истакна адвокатот.
Тој истана и дека сите заборавиле дека докажале и дека Јовановски и неговото семејство имале имот во Ресенско, каде што одгледувале јаболка.
-Миле се занимавал и со одгледување на јаболка. Продавал низ пазарите во Македонија, но и во Србија, истакна Дукоски, кој додаде дека обвинителството неточно тврдело дека немал легални приходи.
Претходно пак обвинителот Пеливанов истакна дека Боки 13 парите од бизнисмените Силјан Мицевски и Ардијан Амзоски, наменети за дом за стари лица, ги потрошил за свои лични потреби. Парите, според обвинителот, Боки 13 ги искористил за купување на лукзузна облека, стан, финансирање на 1ТВ…
За случајот со невладината организација Меѓународен сојуз, основана од Бојан Јовановски-Боки 13, преку која според обвинението биле измамени бизнисмени за наводни центри за возрасни лица, обвинети се и Фросина Ременски, Христина Блажеска, Миле Јовановски, таткото на Боки 13 и Јасна Мандиќ Ерцеговиќ.
Јовановски е обвинет за измама и перење пари. Ременски е обвинета за помагање во делото измама, Мандиќ и Блажеска за помагање во измамата и перењето пари, Миле Јовановски се терети за помагање во перењето пари и за неовластено изработување, држење, посредување и тргување со оружје. Како правно лице обвинета е и невладината организација.
Фокус
