Од денес, 80.000 вработени работници во различни дејности и индустрии, земаат 18.000 денари минимална плата според последните законски измени и дополнувања за раст на минималната плата од март годинава.
Дефинирано е дека висината на минималната плата нема да може да биде пониска од 57 отсто од просечната плата. Ова значи дека растот на минималната плата во иднина ќе биде возможен без дополнителни интервенции и Владата очекува многу брзо, таа да ја надмине и сегашната договорена сума. Државата ќе го субвенционира делот врзан за придонеси, со што се олеснува процесот.
Процентуално во периодот 2012-2016 година минималната плата е зголемена за 25,2 отсто а за период 2016-2022 година за 78,6 отсто.
„Се залагаме за унапредување на животниот стандард, а тоа е потврдено и со растот на пензиите, со бројките за раст на просечната нето плата, со намалување на невработеноста, со зголемената социјална помош, детскиот додаток, образовниот додаток, стипендиите. Продолжуваме со мерките кои обезбедуваат повеќе пари кај граѓаните, повисоки плати и подобар животен стандард“, соопшти денес Владата на стартот на исплатата.
