Ракометар на РК „Бутел“ се бори за живот на скопските клиники и се наоѓа во тешка состојба откако рано утрината бил донесен во болница со тешки повреди, објави порталот „24ракомет“.
Дел од медиумите неофицијално објавија дека се работи за 27-годишниот хрватски интернационалец Денис Тот, кој сезонава го носи дресот на Бутел, а лани играше за Охрид.
Од РК Бутел потврдуваат дека еден од нивните играчи е во болница и дека состојбата е тешка, но немаат информации што точно се случило.
Болнички извори за 24ракомет потврдуваат дека Хрватот бил примен со бројни повреди и неколку скршеници, кои најверојатно се од тепачка или од удари со тврди предмети и дека се наоѓа во тешка здравствена состојба и се бори за живот.
Од МВР засега нема информација за случајот, кој не беше забележан во дневниот полициски билтен.
