Денеска се навршуваат 105 години од раѓањето на Киро Глигоров, првиот претседател на самостојна и независна Република Македонија.
Роден е на денешен ден, на 3 мај во 1917 година во Штип и ќе биде запаматен и како личност кој го предводеше процесот на создавањето на самостојноста на Република Македонија, која како единствена држава од сите поранешни републики на Југославија по мирен пат и без војна прогласи независност.
Претседателот Глигоров со мудрата надворешна политика ја отвори вратата на нашата држава кон светот, модерните демократии и остави личен печат кон нејзината меѓународна афирмација.
Ќе го паметиме по неговото лидерство, искуство и мудри политики во начинот на раководењето со државата во тешките и критични моменти во деведесеттите години. Ќе го паметиме како лидер и државник од кого научивме многу за независноста, самостојноста и зајакнувањето на суверенитетот на нашата држава.
