Претпоставувам дека премиерот ќе продолжи да бара начини како да ја заобиколи бугарската позиција и со тоа да дозволи РСМ да започне преговори со ЕУ, смета бугарскиот европратеник Ангел Џамбаски.
Тој вели дека во последните недели притисокот врз Бугарија за деблокада станал опиплив.
-Видовте дека комесарот Вархеи дојде и рече дека се согласиле да го сменат ставот на Бугарија за само неколку дена. Би било добро да го посетиме Скопје и да видиме како се почитуваат човековите права таму на македонските граѓани со бугарска национална самосвест, вели Џамбаски во изјава за БНТ.
Европратеникот смета дека тврдењето дека Македонија треба да започне преговори со ЕУ поради војната во Украина е апсурдно.
-Македонија е дел од НАТО и таа е заштитена. Ако некој оди да ја нападне, секој мора да ја заштити. Македонизмот во суштина е изграден да биде антибугарски. Бугарскиот интерес бара заштита на бугарската историја, потекло, меморија и култура, македонските граѓани со бугарска самосвест и нашето достоинство како народ. Не ме интересира ниту американската ниту руската дипломатија, нагласил Џамбаски.
Нема проблем, додава Џамбаски, Македонија утре да ги почне преговорите со ЕУ, ако вечерва го свика Собранието и го промени уставот.
-Тие не престануваат со говорот на омраза, ни ги покажуваат коригираните учебници. Тие не направија ништо намерно, туку сакаат Западот да врши притисок врз Бугарија. Ние бевме тие што го спречија ова, изјавил тој.
Според бугарскиот европратеник, ова не е само спор меѓу Бугарија и РСМ, туку спор меѓу ЕУ и земја кандидат.
