Српскиот патријарх Порфириј денеска во Соборниот храм во Белград на архиепископот македонско-охридски Стефан му предаде томос со кој СПЦ ја признава автокефалноста на МПЦ-ОА, јавија српските медиуми. Во Соборниот храм во Белград се одржа света архиерејска литургија на која служеа српскиот и македонскиот патријарх со епископите на двете цркви.
По литургијата се обрати патријархот Порфириј.
„Денес по милоста Божја имаме можност да го крунисаме она што веќе постои меѓу нас, а тоа е единството. Ова единство беше нарушено во еден период, но беше запоставено во духот на Црквата, а тоа е дека Македонската црква, Охридската архиепископија има не само услови, туку и потреба да се организира во контекст на автокефалната црква, да испадне да биде најдобриот можен начин на живот на нашите православни браќа и сестри во Северна Македонија. Затоа она што веќе го реализиравме преку денешното служење на литургијата во Скопје, чувствуваме дека ќе го соопштиме јавно и пред сите со документ наречен томос“, рече Порфириј.
Српскиот патријарх истакна и дека е многу среќен затоа што и Србите и Македонците во Северна Македонија се среќни за автокефалноста на Македонската православна црква. Патријархот Порфириј препорача МПЦ сега да најде соодветно име и додаде дека црквата не може да биде оружје и не е оружје за постигнување други цели.
Порфириј нагласи и дека оваа одлука нема да влијае на другите канонски области на СПЦ, бидејќи, како што рече, условите во Македонија се различни отколку во другите делови на СПЦ. MKD.MK
