Министерството за внатрешни работи огласот за вработување на дури 600 нови млади полицајци го оправдува со тоа што годинава голем број на полициски службеници со бенефициран стаж ќе заминат во пензија.
„Природниот одлив на работници од МВР по основ на пензионирање во 2021 изнесува вкупно 513 работници. Додека за 2022 година се предвидени 877 работници да се пензионираат, со можност и очекување дека бројката ќе се зголемува имајќи во предвид дека по одредени основи за пензионирање одлуката на работникот да се пензионира е на негово лично барање“, гласи објаснувањето од МВР.
МВР во огласот што го објави денеска пред медиумите ги наведе и условите кои треба да се исполнат за вработување, како и бројот по сектори и регионални центри каде што се потребни полицајци.
