На 20 август трета среќа за избор на градоначалници на Маврово и Ростуше и на Центар Жупа

Претседателот на Собранието на Република Северна Македонија, Талат Џафери врз основа на Изборниот законик, денеска распиша избори за градоначалници на Општините Маврово и Ростуше и Центар Жупа за 20 август 2022 година.

„Роковите за извршување на изборните дејствија почнуваат да течат од денот на објавувањето на Решението за распишување на изборите во „Службен весник на Република Северна Македонија, се наведува во соопштението

Изборите, согласно Решението за нивно распишување, ќе ги спроведат Државната изборна комисија, Општинските изборни комисии и Избирачките одбори.

Последниот обид за прегласување беше на 17 април. И тогаш поради необезбеден цензус од 1/3 од вкупното гласачко тело на Центар Жупа изборите не успеаа.

Во Центар Жупа има 7 077 граѓани со право на глас.

На 17-ти април пак не се одржаа изборите за градоначалник во Маврово-Ростуше. ДИК и официјално ја запре постапката за избор на градоначалник бидејќи немаше пријавено ниту еден кандидат. Кандидатот на СДСМ Медат Куртовски ја повлече својата кандидатура бидејќи немало противкандидати, а ВМРО ДПМНЕ најави дека нема да учествува на избори закажани без консултација со нив. На редовните локални избори во октомври минатата година, гласањето беше прогласено за неуспешно бидејќи одзивот на гласачите во Маврово Ростуше не го исполни потребниот цензус да гласаат 30 отсто од вкупниот број избирачи.

Каква ќе биде сликата сега е сосема неизвесно. Во меѓувреме со двете општини раководат повереници што ги назначи владата. (М.Т.)

ОСТАВИ КОМЕНТАР

Please enter your comment!
Please enter your name here