Новиот француски предлог ги содржи сите бугарски барања – и во делот на историјата, и во делот на јазикот, и во делот на идентитетот, оцени Христијан Мицкоски, лидерот на ВМРО-ДПМНЕ. Владата го објави модифицираниот предлог, но истиот се уште е недостапен за јавноста, затоа што веб-страницата е падната.
Според претседателот на најголемата опозициска партија, прифаќањето на предлогот подразбира целосно право на Бугарија да менува учебници и да ги пишува согласно бугарскиот диктат, а децата ќе учат според бугарскиот диктат.
– Еве ја суштината. Секоја држава започнала преговори со меѓувладина конференција. Сега ние ќе имаме два поделени процеси кои ќе значат старт на преговори. Првиот дел е фото сесија. Вториот дел е суштината и промената на Уставот за вклучување на бугарите. За време на фотосесијата треба да се депонираат еднострани изјави за јазикот. Бугарите ќе напишат дека македонскиот е дијалект на бугарскиот. Нашата страна ќе го напише македонскиот јазик. И ова не е некоја победа бидејќи подоцна јазикот е дел од протоколот кој сега во новиот документ се вика годишни извештаи. Во нив се следува спроведувањето на членот 12 од Договорот за добрососедство, пријателство и соработка меѓу Македонија и Бугарија потпишан од Заев-Бојко, кој ги содржи барањата на Бугарија за јазикот, историјата и идентитетот. Вториот документ е суштината каде следува промена на Уставот со влез на бугарите во него. Ова значи дека сѐ додека не се исполнат сите бугарски барања, нема Европска Унија. Ваков ултиматум за Македонија? Не благодарам – рече Мицкоски.
Оваа рамка, според Мицкоски, значи или во ЕУ бугаризирани, или секогаш да останеме надвор од ЕУ.
– Јас ултиматуми по цена на достоинството на народот не прифаќам и нема никогаш да се согласам на тоа. И затоа велам треба да бидеме гласни. Имаше иницијатива за протести и ВМРО-ДПМНЕ ќе се приклучи на таа иницијатива и повикувам на народен протест утре во 19 часот пред Владата на РМ, додаде тој.
Faktor.Mk
