Ние сега имаме рамка во која што има чист македонски јазик, кој што станува официјален јазик на ЕУ, без никакви квалификации, додавки, придавки итн, тврди министерот за надворешни работи Бугар Османи во вечерашната Топ Тема на Телма.
Вели дека после повеќе децении комплетно се затвара прашањето за македонскиот јазик и тоа повеќе никој нема да може да го оспори.
Додаде дека не смета оти овој предлог е идеален, но, како што рече, ни овозможува после 17 години влегување и фаќање на последниот воз за пристап во ЕУ.
-Мислам дека тоа е најголемата придобивка, мислам дека тоа е најголемиот успех во овој процес. и тоа почнувајќи од позиција на Бугарија дека воопшто не треба да го има во рамката за потоа да се нарекува официјален јазик на рсм, мислам дека е тоа многу важно. Бидејќи тоа консумираше најголем дел од енергијата, тоа ни беше мандатот од собранието, тоа ни беше барање од граѓаните, дека идентитетски прашања, прашањето за јазикот нема да дозволиме да се прифатат. и затоа најголемата победа на овој предлог е што се затвори засекогаш прашањето на меѓународното оспорување на јазикот, рече Османи.
