Се е подготвено за првото издание на меморијалниот турнир во ракомет „Крсте Андоновски – Усташ“, кој утре и задутре ќе се одржи во спортската сала „Билјанини Извори“ во Охрид. Покрај домаќинот ГРК Охрид, на турнирот ќе настапат и македонските екипи Тиквеш Кавадарци и Пролет, и гостинот од Србија, Партизан.
На вчерашната прес конференција по повод турнирот, наследниците на оваа голема охридска и македонска ракометна легенда, неговите внуци Крсте и Даниел, кои во моментов го носат дресот на охридскиот клуб, изразија благодарност за можноста да се организира турнирот и надеж дека истиот ќе прерасне во традиционален.
– Да искажам голема благодарност до раководството на ГРК Охрид и општина Охрид што го организираат овој меморијален турнир во чест на мојот покоен дедо, Крсте Андоновски, кој остави голем белег во охридскиот и македонскиот ракомет. Љубовта кон ракометот ни ја всади баш нашиот покоен дедо и сега како фамилија сме многу почестени што ќе се организира еден ваков турнир во негов помен, изјави капитенот на ГРК Охрид, Крсте Андоновски.
– Да се надоврзам на капитенот. Голема благодарност до управата и град Охрид за организацијата на првиот меѓународен меморијален турнир во чест на мојот покоен дедо, охридската ракометна легенда, Крсте Андоновски, додаде Даниел Андоновски.
Капитенот вели дека сите екипи на турнирот се квалитетни и дека овие натпревари се добредојдени за воигрување на екипата пред претстојната натпреварувачка сезона.
Утре, 23 август, на програмата се полуфиналните натпревари во кои од 17:30 часот ќе се сретнат екипите на РК ПАРТИЗАН – РК ПРОЛЕТ 62, додека од 20:00 часот ГРК ОХРИД – ГРК ТИКВЕШ 2014. Задутре, 24 август, поразените во 15:30 играат за 3-то место, а победниците во 18:00 часот финалето.
Влезот за натпреварите е слободен.
