Иако во Куманово недостасуваат тревнати фудбалски терени и има потреба од нови, за жал кумановските деца и спортисти останаа без уште еден терен.
Според она што го дознаваме од ФК Куманово, концесионерот, кој концесија добил од државата пред повеќе од дваесет години, концесијата му истекува набрзо и се предвидува да се даде на владение на Општина Куманово. Од клубот велат дека концесионерот, кој нема дозвола да извршува било каква активност (бидејќи има судиски процес за земјиштето) од непознати причини, во саботата, рано наутро, го изорал фудбалското игралиште МИО, на кое дневно тренираат околу 150 деца.
Концесионерот и онака не го одржувал игралиштето, тревата била уништена, па децата претежно играле на земја. Првично, од клубот се надевале дека се работи за реконструкција на теренот со нова тревната површина со цел подобрување на условите за младите спортисти. Но, очигледно ова не им била намерата, туку за жал, спротивното – уништување на и онака лошиот спортски терен.
Токму од овие причини, во своите програмски мерки, Левица се залага за национализација на спортските објекти. Освен злоупотреба за личен профит, концесионерите не работат во интерес на народот, во овој случај – спортот и спортистите.
Кога спортските објекти ќе бидат во народна сопственост, одговорноста за нивно одржување ќе биде на самите клубови и спортисти, а преку директна помош од општините. Тогаш тие самите ќе се одговорни што се случува со нивниот терен и во какви условите тие самите тренираат, а нема за тоа да зависат од концесионери. За услови за тренирање на спортистите, не може да одлучуваат незаинтересирани капиталисти кои единствен интерес им е личниот профит.
