Во скопскиот Кривичен суд почна судењето за „Беса Транс“. Управителот на компанијата не чувствува вина за фалсификувањето лиценца за автобусот, со кој во ноември лани во несреќа загинаа 45 лица. Обвинителот вели дека на истиот начин 20 пати ја напуштил земјава…
„Не се чувствувам виновен“, изјави пред судот, управителот на „Беса Транс“, Беким Хаџиу. Тој и компанијата како правно лице се обвинети за фалсификување извод од лиценца за вршење меѓународен патен сообраќај, за автобусот со кој во ноември лани во несреќа во Бугарија загинаа 45 лица.
Обвинителот Милошески наведе дека автобусот 20 пати преминал граница со фалсификувана лиценца на граничните премини во 2021 година. Најмногу, 10 пати поминал на „Деве Баир“, возел на релација од Скопје кон Истанбул. Сведочеше и претставник на Министерството за транспорт и врски.
Тој објасни дека компанијата „Беса Транс“ имала лиценца за слободен меѓународен превоз на патници, којашто се однесува на фирмата и врз основа на неа се издаваат изводи од лиценци за секое возило посебно.
Според сведочењето, изводи од лиценци „Беса Транс“ имала за пет автобуси, но не и за автобусот од несреќата. Обвинителниот предлог за цариниците, кои биле должни да ги контролираат изводите од лиценци, обвинителството со доказите ќе ги достави до специјализираното Одделение за гонење кривични дела сторени од лица со посебни овластувања.
Наташа Гркова Петрушевска
