Папата Франциско ги повика луѓето да трошат помалку на божиќните прослави и подароци оваа година и разликата да ја испратат до Украинците за да им помогнат да го надминат гладот и зимскиот студ.
Папата, кој упатува апели за Украина на речиси секој јавен настан од почетокот на руската инвазија во февруари, ја изнесе молбата на крајот од својата неделна општа аудиенција.
„Браќа и сестри, ви велам, има толку многу страдања во Украина, толку многу, толку многу“, рече тој, додавајќи дека сака да го привлече вниманието на конкретните тешкотии со кои Украинците ќе треба да се справат во наредните месеци.
„Убаво е да се слави Божиќ, но ајде да ги намалиме божиќните трошоци. Да имаме поскромен Божиќ, со поскромни подароци и да го испратиме она што ќе го заштедиме на украинскиот народ, кому му е потребно“, рече тој, предизвикувајќи повеќекратен аплауз во салата.
„Тие страдаат толку многу, гладуваат, студено им е и многумина умираат бидејќи нема доволно лекари и медицински сестри“, рече тој.
Додека тој зборуваше, милиони цивили во најголемиот европски конфликт од Втората светска војна се борат со прекини во струјата, греењето и водата предизвикани од руските напади врз инфраструктурата додека преовладуваат температури под нулата.
„Да не заборавиме. Божиќ, да. Во мир со Господ, да. Но со Украинците во нашите срца. Да го направиме овој конкретен гест за нив“, рече Папата. Тој зборуваше истиот ден кога украинската национална црква во Рим, Света Софија, упати нов апел до Италијанците да донираат облека и лекови што волонтерите со камиони ги носат во Украина од март.
mkd.mk
