Случајот „Онишченко“ ќе го коментираме кога ќе заврши истрагата на надлежната институција, изјави завчера премиерот Димитар Ковачевски, одговарајќи на новинарски прашања за случајот во кој иако биле предупредени 9 од десет инстанци на проверка во АНБ дале зелено светло за рускиот шпион Александар Онишченко да добие македонски пасош.
Она што Ковачевски не го кажа во изјавата е дека истрагата за која тој зборува се води во АНБ и тоа под контрола на новиот шеф на Агенцијата за национална безбедност Зарко Милошески кој и самиот е меѓу осомничените дека спротивно на законот и процедурите дозволил издавање макеоднски пасош на човек на руската тајна служба.
Со оглед на тоа што во моментов во АНБ нема шеф на секторот за внатрешна контрола кој треба да ја спроведе истрагата за случајот и да ги потпише резултатите од неа, истата ќе се води под контрола на новиот директор Милошески.
Со тоа Македонија станува единствена земја во НАТО и ЕУ каде се води сериозна истрага во тајна служба а еден од главните осомничени има директна контрола врз истрагата и резултатите од неа.
Со тоа целосно се урива системот на контрола и надзор врз тајните служби кој важи за сите членки на алијансата и унијата.
Милошески според расположивите информации како овластено лице од секторот за проверки во АНБ се потпишал на позитивното мислење за Онишченко иако како и екс директорот Виктор Димовски бил предупреден дека во случајот Онишченко нешто ,,смрди”.
Еден од десетте луѓе кои го проверувале рускиот шпион откако тој побарал македонски пасош предупредил дека Онишченко е спорен од безбедносен аспект и дека не треба да добие државјанство но од засега непознати причини првите луѓе во АНБ меѓу кои и новиот шеф Милошевски а потоа владата не го послушале.
Речиси невозможно е новиот директор да дозволи истрагата да покаже дека тој е виновник или еден од виновниците за најголемиот скандал во историјата на македонските тајни служби од како сме членка на НАТО.
