Министерот за внатрешни работи Оливер Спасовски изрази сочувство по повод хеликоптерската несреќа во која загинаа министерот за внатрешни работи на Украина, Денис Монастирски, неговиот заменик и државниот секретар.
-Во име на МВР го изразувам моето најискрено сочувство до народот на Украина, семејството, колегите и пријателите на мојот украински колега – министерот за внатрешни работи Денис Монастирски кој заедно со водството на министерството го загуби својот живот во трагична хеликоптерска несреќа во близина на Киев, напиша Спасовски на Твитер.
Најмалку 16 лица загинаа утрово при уривање на хеликоптер во градот Бровари во киевската област.
-Утрово, на 18 јануари, во Бровари се урна хеликоптер на Државната служба за вонредни состојби. Како последица на авионската несреќа загина раководството на МВР: министерот, првиот заменик министер и државниот секретар. Се знае дека вкупно загинале 16 лица, меѓу кои и две деца. Од нив, девет биле во хеликоптерот, информира шефот на Националната полиција на Украина, Игор Клименко.
Тој додаде дека 22 повредени се во болница, од кои 10 се деца.
