Марјан Стаменковски од „ДоказМ“ намалената затворска казна, започна да ја издржува во затворот „Идризово“. Истовремено, се уште не е спроведена судската одлука за бришење на домен-адресата на неговиот портал, каде се пласираа текстовите за кои е осуден. Но хостингот на порталот е исклучен.
Стаменковски е спроведен во најголемиот затвор во земјава, каде ќе треба да остане уште две години и два месеци. Тој досега помина четири месеци во притвор, поради опасност од бегство.
Првичната казна за Стаменковски беше три години и еден месец. Потоа, Апелација му ја намали на две години и шест месеци. Нему одново ќе му се суди за делото – уцена.
При претресот во станот каде престојуваше, нему му беше одземена и поголема сума на пари, според неофицијални информации над 90.000 евра за кои сомнежите се дека потекнуваат од други кривични дела. Поради ова, се води и втор предмет против него.
