Од политичката партија Левица бараат оставка од министерот за здравство, Фатмир Меџити, кој велат дека за кратко време направил непростливи гафови.
-Министерот за здравство, Фатмир Меџити за краток период ни покажа дека продолжува практиката на врвот од државата да се поставуваат личности коишто може да бидат арогантно амбициозни, кусогледи, некомпетентени, и неспособни да ја извршуваат функцијата што им ја доверуваат политичките партии што се во коалиција со власта.
Со доаѓањето на новиот министер, делегиран од Политичката партија, Алијанса за Албанците – Меџити, имајки пред себе многу проблеми во јавното здравство коишто требаше да почне да ги решава, пред се‘ решавањето на недостатокот на севкупен медицински персонал и неговото постојано одлевање, тој избра да го разгори револтот, што и така го имаат граѓаните кон севкупното јавно здравство. Меџити, за приоритет во неговата агенда си постави да разрешува организациони и медицински директори на скопските клиники и како врв на неговите гафови беше наредбата да има исти цени во јавното здравтсво за граѓаните од Косово и Албанија.
На социјалните мрежи, македонската јавност најжестоко реагираше поради разрешувањето од должност на хирургот Сашко Јовев, чие отстранување од директорската позиција на кардиохирургија остана без вистинско објаснување за вина. Дополнително, Министерот за здравтсво, нема валидно објаснување за сопственото образование во Сараево во период 1993-1995 кога во Босна беснееше војна и кога процесот на образование на тој медицински факултет бил сопрен.
Здравствениот сектор на Политичката партија Левица го повикува министерот да одговри на прашањето „Дали е точно дека ја купил дипломата за завршен медицински факултет во Сараево?“. Доколку Меџити и понатаму остане без одговор на ова прашање, што не му е поставено прв пат, доведува до широк спектар на сомнеж од страна на народот за компетентноста на личностите што се поставуваат да бидат на врвовите на државните институции.
Додека министерот Меџити, не направил уште некоја штета во здравствениот систем, Здравствениот сектор на Политичката партија Левица го повикува Меџити да си даде неотповиклива оставка од функцијата што му е доделена, затоа што граѓаните и покрај револтот од лошите услови во државните болници, револтирани се и од некадарните министри што пристапот до здравствена заштита го направија невозможна мисија. – велат од Левица.
