Сите учесници на состанокот, со исклучок на СВР Охрид, го потпишаа барањето до Владата на РСМ и Министерството за транспорт и врски за да се одложат градежните работи меѓу Подмоље и Охрид за во септември но додека траше состанокот машините на терен веќе го откорнаа асфалот на влезот од Охрид.
Изградбата на автопатот од Подмоље до Охрид и пренасочувањето на сообраќајот на стариот пат Охрид-Струга ги собра на состанок охридскиот градоначалник Кирил Пецаков со претставници на Хотелската асоцијација на Македонија, угостителскиот еснаф од Охрид, туроператори, туристички агенции, СВР Охрид и стручните служби при Општина Охрид.
Сите учесници на состанокот, со исклучок на СВР Охрид, го потпишаа барањето до Владата на РСМ и Министерството за транспорт и врски за да се одложат градежните работи меѓу Подмоље и Охрид за во септември.
„До ова барање се дојде имајќи предвид дека не станува збор за последни километри за изградба од автопатската делница, па така градежните активности може да се насочат на друга точка, а од септември да продолжат на оваа“, се наведува во барањето, додавајќи дека ваквиот потег бил погубна одлука бидејќи со тоа значајно ќе се намалел бројот на гости кои што ќе престојуваат во Охрид.
